Të paktën 35 persona u plagosën pasi një shpërthim i fuqishëm goditi një fabrikë optike-mekanike në rajonin e Moskës të Rusisë, njoftuan mediat lokale.
Shpërthimi ndodhi në një magazinë që përmbante pajisje piroteknike në qytetin Sergiyev Posad, 50 km (30 milje) në verilindje të Moskës, të mërkurën.
“Në territorin e fabrikës mekaniko-optike Zagorsk ka ndodhur një shpërthim”, ka shkruar kryetari i bashkisë së qytetit, Dmitri Akulov, në llogarinë e tij në Telegram.
Më vonë, Akulov shtoi se numri i të plagosurve nga shpërthimi ishte rritur në 35 persona, “katër prej tyre në gjendje të rëndë”.
Sipas informacioneve mësohet se shumica e të plagosurve kanë plagë të rënda.
Policia bën me dije se incidenti mund të ketë ndodhur për shkak të shkeljes së rregullave të sigurisë në fabrikë.
Ndërkohë autoritetet kanë hapur një hetim për të zbuluar shkaqet e këtij incidenti.
Kompania PiroRoss, e cila ka marrë me qira magazinë, është në procedurë falimentimi, njoftoi agjencia e lajmeve TASS.
