Presidenti Ilir Meta ka rritur sërish tonet këtë të enjte, teksa situata politike është komplikuar edhe më tepër me shkarkimin e anëtarit të Gjykatës Kushtetuese Besnik Muçi, si dhe me reagimin e Ambasadës Amerikane.
“Larg duart nga Gjykata Kushtetuese, hipokritët që duan të çojnë në Venecia, janë hipokritë, sepse duhet të çonin zgjedhjen e Arta Markut. Tani duan ta bëjnë për të shpëtuar Dvoranin, që ka patur edhe mbështetjen e disa ndërkombëtarëve për të përdhunuar Kushtetutën”, tha Meta.
“Ka vetëm një zgjidhje për Edi Ramën dhe disa palaço ndërkombëtarë, ka vetëm një zgjidhje tani: Referendumi. Nuk i pengoj as diplomatët të dalin me Edi Ramën, unë do dalë me popullin”, theksoi më tej Meta.
LEXO EDHE: Besnik Muçi pas shkarkimit: Nuk e njoh vendimin. Presidenca: Turp, turp
Duke mos komentuar shumë telefonatën me zyrtarin e DASH, kreu i shtetit deklaroi: “SHBA janë si yll si shpirt se me ata i kemi bërë Kushtetutën. Presidenti është në kushtetutë dhe jo në rregulloren e ndonjë ambasade. Prandaj i kam ftuar të vijnë me ekspertët e tyre dhe t’u tregoj kushtetutën e Shqipërisë“.
Në lidhje me shkarkimin e Besnik Muçit, presidenti tha: “Zero surprizë nga vettingu i partisë. Nuk jam habitur se që ditën e parë që ka hyrë në zyrë ka patur presion e politike. Ju e dini shumë mirë që ka patur presion për të penguar Xhaferllarin për të ushtruar detyrën e saj. Presionet i ka pasur nga shumica. Nuk besoj se keni harruar edhe deklaratën e Xhafajt, që i bëri presion dhe shantazh Vitore Tushës. Rama bllokoi Kushtetuesen me disa palaço ndërkombëtarë”.
LEXO EDHE: Gjykata Kushtetuese/ Ambasada e SHBA: Drejtojuni Komisionit të Venecias
Duke ju referuar situatë së krijuar, ambasada amerikane vëren se “ky përparim i nevojshëm ka ngecur për shkak të interpretimeve të ndryshme ligjore të procesit të emërimit, parashikuar nga kushtetuta shqiptare dhe ligjet për zbatimin e reformës në drejtësi. Institucionet gjyqësore shqiptare, kushtetuta dhe ligjet për zbatimin e reformës në drejtësi, duhet të udhëheqin procesin e zgjidhjes së këtyre intepretimeve të debatuara. Në mungesë të një institucioni të përshtatshëm ligjor, i cili mund të vendoste mbi intepretimet e kundërta, Shtetet e Bashkuara – thekson deklarata – mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Gjithashtu, nxisim palët kundërshtuese që të respektojnë opinionin ligjor të Komisionit të Venecias. Ecja në këtë drejtim do të ishte tërësisht në përputhje me aspiratat europiane të vendit”./ Opinion.al
