Në një dalje për mediat nga selia blu kreu i PD Lulzim Basha ka bërë disa akuza të forta ndaj kryeministrit Edi Rama. Ai është shprehur se Rama po zhbën shtyllën e Reformës në Drejtësi. Sipas kreut të demokratëve, pas propozimit të mazhorancës për ndryshimin e rregullores së Kuvendit, fshihet një ligj i posaçëm për të mbrojtur “peshqit e mëdhenj” nga drejtësia. Më tej kreu i opozitës ka deklaruar se Rama po e kthen në ligj mënyrën e mbrojtjes që bëri ndaj ish ministrit të Brendshëm Saimir Tahirit.
“Edi Rama ka propozuar një ligj të posaçëm, i propozuar gjoja si ndryshim i rregullores, por është një ligj i posaçëm për të mbrojtur peshqit e mëdhenj. Të gjithë ata që prisnin arrestimin dhe vënien para drejtësisë të peshqve të mëdhenj, tani duhet të kënaqen me cironka”, deklaroi Lulzim Basha.
“Ligji propozon që Prokuroria të paraqesë provat në Kuvend dhe gjyqtari të jetë Edi Rama. Kjo do ta kthejë SPAK-un në një organizatë joqeveritare, sepse gjithë pushteti për të vendosur nëse politikanët e korruptuar do të paraqiten para drejtësisë apo jo, do të jetë i mazhorancës, i Edi Ramës”, shtoi ai.
“PD do ta kundërshtojë fuqishëm këtë akt i cili ka një synim; zhbërjen e reformës në drejtësi dhe që asnjë peshk i madh të mos dalë para gjykatës. Po bëjnë gjithçka për t’u mbrojtur politikisht nga reforma në drejtësi. Vota kundër është ajo që opozita ka në dorë, të tjerat i kanë qytetarët në dorë në protestën e 27 janarit”, deklaroi Basha.
/Opinion.al
