Dy persona janë arrestuar nga Policia e Tiranës pasi akuzohen për shpërndarje të lëndëve narkotike. Policia njofton se përveç të arrestuarve, janë proceduar dhe dy persona të tjerë.
Autoritetet deklarojnë se personat e arrestuar janë identifikuar me inicialet H. H., 29 vjeç dhe A. A., 26 vjeç, ndërsa të proceduarit janë A. Xh., 21 vjeç dhe D. V., 23 vjeç, të gjithë banues në Tiranë.
Gjatë kontrollit të banesave të të arrestuarve u gjetën dhe u sekuestruan disa doza me lëndë narkotike, një shumë prej 404.000 lekësh të reja dhe 4 telefona celular të markave të ndryshme.
Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore, për veprat penale “Prodhimi dhe shitja e narkotikëve”, e kryer në bashkëpunim, në ngarkim të shtetasve H. H. dhe A. A., si dhe për veprën penale “Prodhimi dhe shitja e narkotikëve”, në ngarkim të shtetasve D. V. dhe A. Xh./ Opinion.al
