Ditën e sotme u mësua se Qeveria ka dhënë shpërblim 5 mijë lekë të reja për muajin mars për mjekët dhe infermierët dhe jo 1 mijë euro siç u premtua më herët.
Kjo gjë bëri që personeli i urgjencës së spitalit rajonal të Lezhë të refuzojë shpërblimin prej 5 mijë lekë të reja, duke thënë që ato para të shkojnë për familjet në nevojë.
Pas këtij lajmi, ka reaguar kryeministri Edi Rama. Përmes një postimi në rrjetet sociale, kryeministri thotë se shpërblimi 1 mijë euro do të jepet mbi pagën për mjekët e infermierët në vijën e zjarrit në luftën ndaj koronavirusit.
Po ashtu, Rama shton se; “Kush ka ngatërruar vijën e zjarrit në spitalet Covid e në autoambulanca, me detyrën e bluzës së bardhë në territor, duhet të kthjellohet e të mos turpërojë bluzën e bardhë.”
“Unë e kam thënë shqip që do të paguajmë 1000€ mbi pagën për mjekët e infermierët në Vijën e Zjarrit! Kush ka ngatërruar vijën e zjarrit në spitalet Covid e në autoambulanca, me detyrën e bluzës së bardhë në territor, duhet të kthjellohet e të mos turpërojë bluzën e bardhë! Kush i nxit nga jashtë kërkesat për shpërblime pa asnjë sens bën politikën e mbrapshtë që ka bërë gjithnjë dhe do ndëshkohet nga populli, kush nga brenda bëhet mashë politike cënon misionin e shenjtë e moralin e bluzave të bardha në këtë luftë dhe nuk do të justifikohet në vijim!”-shprehet Rama./Opinion.al
