49-vjeçari, Fadi Alwan i dyshuar si autor i vrasjes me thikë të bashkëshortes së tij 24-vjeçare, Rayyan Alwan është shpallur në kërkim ndërkombëtar nga Policia e Shtetit.
Burime pranë grupit hetimor i thanë Tv Klan se nga verifikimet palestinezi i vënë nën akuzë, rezulton të ketë udhëtuar nga Amsterdami i Holandës, drejt Brukselit në Belgjikë.
Mbi bazën e këtyre të dhënave autoritetet shqiptare, përmes Interpol kanë nisur gjurmimin e 49-vjeçarit. Dyshimet janë që ai të jetë larguar dhe nga Brukseli drejt një qyteti tjetër.
Fadi Alwan rezultoi të ketë hyrë në Shqipëri së bashku me 24-vjeçaren, Rayyan Alwan që sipas policisë ishte bashkëshortja e tij, më 19 shkurt.
Vetëm 3 ditë më vonë, më 22 Shkurt, ditë kur mendohet të jetë kryer dhe vrasja me thikë e të resë, 49-vjeçari është larguar nga Shqipëria përmes aeroportit të Rinasit.
Fillimisht ai fluturoi drejt Greqisë e më pas në Holandë.
Për hetuesit mbetet enigmë motivi i ngjarjes së rëndë, regjistruar në një apartament të marrë me qira në rrugën “Gjon Muzaka” në kryeqytet.
Pikërisht në këtë banesë u gjet e pajetë dhe e reja, Rayyan Alwan mesiditen e 27 Shkurtit.
