Nga qyteti i Shkodrës ku ka marrë pjesë në një aktivitet me strukturat e Partisë Demokratike në atë qark, Lulzim Basha ka folur për përplasjet sot te zona e “Astirit” në Tiranë, ku u shoqërua edhe ish-deputeti Klevis Balliu. Basha tha sot se kryeministri Rama po rikthen të burgosurit politikë.
“Shqipëria gjendet në një udhëkryq, ata që paguhen me taksat e shqiptarëve për t’i mbrojtur, mbajnë sot në qelitë e burgut të burgosur politikë që janë ngritur kundër padrejtësisë. Po, po! Sot në mesditë në Tiranë njerëz të veshur me uniformë, kanë dhunuar njerëzit që mbronin shtëpitë. Kur ne si ish-deputetë, ndër të cilët Klevis Balliu, shkuam pranë njerëzve, kanë urdhëruar arrestimin e tyre. Sot është dita kur Rama do të rikthejë të burgosurit politikë në Shqipëri. Kjo është dita dhe ky është vendi për t’i thënë: I ke orët e numëruara”, tha Basha gjatë aktivitetit të Shkodrës, duke i ftuar të gjithë në protestën e 11 majit në kryeqytet./Opinion.al
