Bujar Nishani, aktualisht Kryetar i Këshillit Kombëtar të Partisë Demokratike, nëpërmjet një statusi në Facebook u është drejtuar ambasadorëve të huaj në Shqipëri. Duke iu referuar shoqërimit të Florenc Hoxhës, Nishani thotë se një Kryegangsterr ka uzurpuar zyrën e qeverisë.
“Një grup kapuçonës të zinj, ja si e përdorin emrin, forcën, pushtetin e shtetit tek godasin me grushta një person që thonë se po e shoqërojnë në polici. Këta banditë nuk do mund të kishin këtë kurajo prej nazistësh nëse një Kryegangsterr nuk do të kishte uzurpuar zyrën e Qeverisë pikërisht me ndihmën e këtyre tipave.
Nëse opozita nuk kërkon hetimin e këtyre gangsterrëve dhe urdhërdhënësve të tyre është në bashkëfajsi. Zotërinj ambasador të huaj, ja këta janë partnerët tuaj në Shqipëri. Uragani popullor i shqiptarëve nuk trembet dot, Jo!”, shkruan Nishani.
Sot ambasadorët e huaj në Tiranë bënë thirrje për qetësi gjatë protestës dhe dënuan dhunën e ushtruar.
