Një ngjarje e rëndë ka ndodhur në Teksas, ku një djalë 15-vjeçar ka filmuar live vdekjen e tij si pasojë e lojës së frikshme “Balena Blu:. Ai është gjetur në dhomën e tij i varur brenda dollapit nga i ati. Më pas ai gjeti pranë të birit të pajetë, telefonin e tij me të cilin kishte filmuar live të gjithë procesin.
Jorge Gonzalez, babai i adoleshentit dhe gruaja e tij Angela janë të shokuar nga ky veprim dhe ende e kanë të vështirë ta besojnë. Ata janë të bindur që djali i tyre luante lojën vdekjeprurëse “Balena Blu”, pasi sfidat e saj janë të tilla. Jorge rrëfen për “Daily Mail” se kishte pyetur fëmijët e tij në lidhje me lojën pasi kishte lexuar për të në media. Por djali që u vetëvra, Isah i kishte thënë të atit se kishte dëgjuar për lojën, por nuk do të luante kurrë.
Por pas vdekjes ata panë telefonin e të birit, ku ai i kishte dërguar miqve të tij foto teksa kryente sfidat e tmerrshme dhe në fund u thoshte se sfida e fundit do të ishte vetëvrasja. Pas kësaj ngjarjeje të rëndë, prindërit e adoleshentit të ndjerë, u bëjnë thirrje të gjithë prindërve nëpër botë që të kenë kontroll në telefonat e fëmijëve si edhe të shohin me detaje rrjetet e tyre sociale.
Shumë vdekje kanë ndodhur kohët e fundit nga kjo lojë, dhe shifrat sa vijnë e shtohen. Të gjithë ekspertët e kibernetikës, u bëjnë thirrje prindërve të tregohen të kujdesshëm me fëmijët e tyre përpara se të jetë shumë vonë./Opinion.al
