Vetëvrasja tragjike e adoleshentit nga Berati ka shkaktuar një plagë të thellë jo vetëm tek familjarët por edhe tek shokët e tij. Ai ishte nxënësi i shkollës së mesme profesionale të Beratit “Stiliano Bandilli”. P.Xh nga fshati Tomorr i dha fund jetës duke pirë fotoksinë dhe burimet nga policia thanë se shkak mund të jetë bulizmi, pasi në shkollë e shanin: “fshatar”.
Por një prej shokëve të tij të shkollës thotë se kjo nuk është arsyeja e vertetë e vetëvrasjes, pasi nuk e tallte njeri se të gjithë në këtë shkollë nga fshati janë. Shoku i tij pretendeon se arsyeja e vertetë është dashuria e munguar e një vajze të shkollës.
“Unë e njihja shumë mirë atë djalë, ishte shoku im, ai ishte shumë djalë i mirë, të gjithë e donim Titin. Shkolla përbëhet nga 96% e nxënësve nga fshati. Policia është mashtruese. E vërteta qëndron këtu, që në vit të parë donte një vajzë që kishte që në vit të parë, e donte dhe kishte rëndë brenda keq me atë, ky i propozoi, por ajo nuk pranoi, u vetëvra, piu fotoksinë. Atë vajzë ai e kishte në klasë, hapej vetëm me një djalë nga klasa, ky shoku i tha lëre se nuk bëhet gjë. Ky mbylli Facebook-un një ditë parë se të pintë fotoksinë. Kishte rënë shumë keq me atë gocën, i propozoi ai, por kjo s’pranoi, ia bërë të qartë që jo dhe nga kjo ai piu fotoksinë. Ishte tip i mbyllur në vetvete, Titi nuk hapej me asnjë, nuk e menduam që do të arrinte deri në këtë pikë. Kjo është e vërteta dhe jo ajo që thotë policia”, ka thënë shoku i të riut që i dha fund jetës, për JOQ.
I pyetur nëse mbante mend bisedën e fundit me Titin, ai u shpreh:
“Faktikisht me Titin s’kam folur në Facebook dhe në shkollë s’para e shikoja. Mbaj mend vetëm kur e takova në rresht para ca kohësh, i thashë “Titi ca bën” edhe kaq. Por, sa më tregoi një shok qe kishte në klasë, ky para se të pinte fotoksinë kishte ardhur në shkollë, bëri vetëm 4 orë mësim dhe kur vajti tek shkallët i tha ky shoku “Titi ku vete?”, por ai s’foli, por iku, kjo është e gjitha. Ai ka motër dhe vëlla, për motrën e tij më vjen shumë keq, gjynah se ishte këputur fare nga vdekja e vëllait”.
