KOPENHAGEN-Është në kufijtë e absurdit deklarata e trajnerit danez, Morten Olsen. I zgjënjyer me rezultatin e mbrëmshëm Shqipëri-Danimarkë, ai përpiqet të çojë vemendjen gjetkë. Tek detaje që në fakt nuk i përkasin. Në konferencën për mediat pas ndeshjes ai u mor me dronin në Serbi-Shqipëri dhe Ismail Morinën. “Ndiej neveri sesi një person që e ka lëshuar dronin, vjen në Danimarkë dhe bën foto me lojtarët shqiptarë në hotel, në një kohë që UEFA hesht”. Kështu u shpreh Olsen, duke shokuar gjithë gazetarët, jo vetëm ata shqiptarë. Më tej, ai vazhdoi: “Kjo nuk është një lojë e ndershme. Ende nuk e kuptoj si Shqipëria mori tri pikët në tavolinë ndaj Serbisë”.
I pyetur për barazimin në fushën e tij, trajneri danez tha: “Ishim nën presion dhe kjo ndikoi në lojën tonë”. Më tej, arguemnton: “Shqipëria ishte surprizë e madhe dhe nuk arritëm të bënim mjaftueshëm për të dalë me fitore. Përpjekjet tona ishin të dobëta për të gjetur golin, por edhe topin nuk arritëm ta qarkullonim si duhet. U munduam të rregullonim gjërat pas pushimit. Ne ishim më të rrezikshëm dhe krijuam shanset për gol, por nuk shënuam. Gjithsesi, barazimi ishte si rezultati i dytë më i mirë për ne dhe këtë duhet ta pranojmë. Tani duhet të shikojmë përpara”.
