Genta Kaloçi, e njohur si psikologe dhe një anëtare e Partisë Komuniste të Shqipërisë, ka shokuar opinionin publik, duke shprehur kënaqësi për vdekjen e djalit të vetëm të shkrimtares Flutura Açka, në lule të moshës, vetëm 18 vjeç.
Kaloçi edhe pse një ateiste, e shikon ndarjen e parakohshme nga jeta të djalit të vetëm të shkrimtares Açka, jo si një gjëmë apo fatkeqësi, por si një drejtësi e ardhur nga lart dhe e provokuar për shkak të bindjeve të saja anti-komuniste.
Komenti i shkruar nga ajo një ditë më parë, po bën xhiron në rrjetin social Facebook, duke provokuar irritim tek lexuesit sa dhe mbështetje tek shokët e saj ideologjik.
Si për të mos u mjaftuar me kaq, ajo ndjehet mirë edhe për faktin se gjëma ka prekur edhe të tjerë anti-komunistë në vend, disa nuk kanë krijuar familje dhe disa të tjerë për shkak të fatkeqësive të ndryshme kanë përjetuar tragjedi.
Duke përfshirë: Visar Zhitin, Spartak Ngjelën, Avenir Pekën, Maks Velon etj.
“Natyra i godet me shfarosje të farës, fëmijëve të parë dhe të vetëm, pikërisht atëherë kur mendojnë se kanë siguruar pasardhësin e tyre dhe gjoja kanë përjetuar prindërimin e budallëkut dhe injorancës së tyre”,- shkruan ajo.
Ndërsa shton: Përse pasardhësit e kolosit nuk i ka goditur fati me fatkeqësi natyrore (përveçse me padrejtësi e krime njerëzore) Asgjë nuk është rastësi. Mendojeni këtë variant kaq të thjeshtë, se kuptimi i së drejtës dhe jetës fshihet në këto raste e detaje kaq të thjeshta. Gjithçka shpaguhet në jetë, sidomos mosmirënjohja dhe padrejtësia kur i jep gojës para mëndjes.
