Ministri i Mbrojtjes, Niko Peleshi, ka dalë këtë të martë në një konferencë për mediat, ku ka folur rreth situatës së zjarreve dhe paralajmërimin e ekspertëve të Gjeoshkencave për reshje me intensitet të lartë në disa qarqe të vendit.
Ai tha se zjarret këtë verë kanë qenë të shumtë, por me pak dëme gjë që dëshmon sipas tij, efikasitetin e ndërhyrjes.
Po ashtu Peleshi u ndal edhe tek situata e përmbytje duke u bërë thirrje qytetarëve për bashkëpunim në rast emergjencash.
“Kemi shmangur zjarret në pemëtari. Në 24 orë ka pasur disa vatra aktive, në Fier e Vlorë. Por gjithashtu zjarr kritik ka qenë zjarri mbi Porto Palermo, pranë Qeparoit që u menaxhua në një kohë të shpejt. Një zjarr tjetër delikat, ishte ai afër Kishës së Laçit. Por tashme kemi patur reshje në veri, dhe mund të ketë dalje nga shtrati të ndonjë përroi, apo përmbytje. I bëj thirrje qytetarëve të bashkëpunojnë për çdo situatë emergjence, dhe më pas bashkive që të jenë të gatshëm”, tha Peleshi.
Ministri i Mbrojtjes Niko Peleshi ka falënderuar gjithashtu të gjithë efektivët e zjarrfikëses që po japin kontributin e tyre në shuarjen e flakëve në Greqi.
