Ligjvënësit e partive maqedonase ‘VMRO-DPMNE’ dhe ‘Znam’ si dhe ata të koalicionit të partive shqiptare “Vlen”, dorëzuan të premten në parlament nismën për interpelancë me pesë anëtarëve të Këshillit Gjyqësor.
Ligjvënësit thonë se Këshilli nuk po funksionon si një institucion i shtetit të së drejtës dhe se “çdo fije dyshimi mbi punën e anëtarëve të tij, duhet të analizohet me themel në mënyrë që publiku të sigurohet se ai punon me ndershmëri, profesionalisht dhe në interes të qytetarëve”, tha Nikolla Micevski, kryetar i grupit të deputetëve të VMRO-së.
Pesë nga trembëdhjetë anëtarët e këtij Këshilli i zgjedh parlamenti i Maqedonisë së Veriut. Të tjerët zgjidhen me konkurs nga radhët e gjykatësve.
Në muajt e fundit ka pasur përplasje brenda vetë anëtarëve të këtij Këshilli dhe kryetarja e tij, Vesna Damevska, dha dorëheqjen.
Në vend të saj, në fillim të janarit u zgjodh Aleksandar Kambovski. Anëtarët e zgjedhin kryetarin nga radhët e tyre.
Këshilli Gjyqësor zgjedh gjykatësit e rinj të gjykatave themelore dhe të apelit dhe mund t’i shkarkojë ata.
Opozita nuk ka reaguar pas këtij zhvillimi, por më parë Lidhja Social Demokrate dhe Bashkimi Demokratik për Integrim i kanë cilësuar deklaratat e VMRO-së që synojnë shpërbërjen e Këshillit, si përpjekje për ndërhyrje në gjyqësor dhe frikësimin e gjykatësve.
Shefi i grupit të deputetëve të VMRO-DPMNE-së, zoti Micevski tha në një konferencë shtypi se parlamenti nuk e miratoi raportin vjetor për punën e Këshillit Gjyqësor për vitin 2023 dhe se shumica parlamentare votoi kundër.
“Kjo flet mjaftueshëm dhe është një nga arsyet që ne po kërkojmë sot këtë interpelancë”, u shpreh ai duke theksuar mungesën e tranparencës dhe të llogaridhënies, sipas tij, në punën që kryen ky Këshill.
Qëndrime kundër Këshillit ka mbajtur edhe Kryeministri Hristijan Mickovski duke theksuar në disa raste që prej ardhjes së tij në pushtet, se ky organ duhet të shpërbëhet, për shkak të besueshmrisë shumë të ulët të publikut tek gjyqësori.
Në një status në rrjetet sociale, zoti Mickovski shkruante se anëtarët e Këshillit të emëruar nga Parlamenti, mund të vazhdojnë të jenë pjesë e tij edhe pas interpelancës kundër tyre.
Ai shkruante se“drejtësia mund të arrihet me reforma të thella dhe ndryshime serioze ndaj praktikave të keqpërdorimit që kanë hedhur rrënjë në sistemin gjyqësor”.
Por nga ana tjetër, eksponentë të VMRO-së thanë se megjithëse parlamenti nuk do t’i shkarkojë pesë anëtarët e Këshillit të zgjedhur prej vetë atij, ata do të duhet që ta japin vetë dorëheqjen, pas interpelancës.
Anëtarë të Këshillit Gjyqësor janë automatikisht edhe Ministri i Drejtësisë si dhe Kryetari i Gjykatës së Lartë, por pa të drejtë vote në marrjen e vendimeve.
Pesë anëtarët e zgjedhur prej parlamentit, janë Vesna Dameva, Selim Ademi, Milazim Mustafa, Pavlina Cërvenkovska dhe Tanja Çaçarova Ilievska./voa
