Shkumbini “përlan” edhe një urë tjetër në Peqin. Gjatë natës që shkoi ujërat e lumit Shkumbin kanë shembur urën e fshatit Grykshi i Madh në njësinë administrative të Pajovës duke izoluar rreth 3000 mijë banorë.
Ura është këputur në mes dhe nuk ka asnjë mundësi riparimi. Banorëve u duhet të udhëtojnë me kilometra përgjatë një rruge tepër të vështirë për tu lidhur me qytetin. Ata apelojnë për gjetjen e një zgjidhje provizore.
Ndërkohë edhe ura e fshatit Çengelaj, e cila është e përbërë nga porta që mbyllen gjatë verës për devijimin e ujit në kanalin Peqin Kavajë ka pësuar dëmtime dhe zhvendosje. Masive drurësh dhe inertesh kanë ngecur në këmbët e urës dhe vazhdojnë të rëndojnë situatën e saj duke përshpejtuar shembjen. Nëse edhe kjo urë shembet atëherë të gjithë fshatrat e njësisë administrative Shezë, Belshi dhe disa fshatra të Lushnjës nuk kanë më mundësi të qarkullojnë në këtë segment rrugor.
Ndërhyrja për pastrim është mjaft e rrezikshme për shkak të prurjeve të mëdha që vazhdon të sjellë lumi Shkumbin.
Kjo e çon në 9 numrin e urave të dëmtuara në qarkun e Elbasanit. 5 prej tyre janë në Gramsh, një në Librazhd, një në Elbasan dhe 2 në Peqin.
Fatos Salliu
