Javën që lamë pas në ndeshjen e Kategorisë së Parë mes Shkumbimit dhe Dinamos, loja është shoqëruar me dhunë.
Në përfundim të ndeshjes në Peqin disa tifozë hynë në fushë dhe dhunuan duke qëlluar me grushte arbitrin Sokol Bebja.
Diçka e tillë ka ndodhur për shkak të vendimeve të tij të marrë gjatë ndeshjes. Mësohet se komisioni i disiplinës ka marrë vendim lidhur me dhunën e ushtruar një javë më parë.
Federata Shqiptare e Futbollit ka vendosur që skuadra e Shkumbinit si vend organizator i ndeshjes të përjashtohet nga aktivitetet futbollistike për sezonin 2019-2020 si dhe të dënohet me 500.000 lekë gjobë.
Ndërkohë futbollisti i kësaj skuadre Andi Bakiasi, për goditje të përsëritur dhe kërcënim ndaj zyrtarit të ndeshjes është dënuar me përjashtimin përjetë nga çdo aktivitet futbollistik i organizuar nga FSHF.
Gjithashtu skuadra e Shkumbinit është zbritur me një kategori në Kampionatin Kombëtar të Futbollit, nga Kategoria e Parë në Kategorinë e Dytë.
Si dhe sipas komisionit të disiplinës skuadra e Shkumbinit humb në tavolinë ndeshjen kundër Dinamos me rezultatin 0-3 si dhe i zbriten tre pikë nga klasifikimi.
“1. KF Shkumbini, për dështim në përmbushjen e përgjegjësive në organizimin e ndeshjes kundër KF Dinamo, duke mos zbatuar rregullat e sigurisë dhe duke mos garantuar sigurinë e zyrtarëve të ndeshjes dhe zbatimin e ligjit si dhe kërcënimin e zyrtarëve të ndeshjes, në bazë të nenit 10/1/o, 31, 57/2, 63/1/b, 63/1/c, 63/1/e, 64/1, 62/2 dhe neni 65 të KDS dënohet me përjashtimin nga çdo aktivitet futbollistik për sezonet 2019-2020 si dhe gjobë në masën 1.000.000 leke. Në bazë të nenit 116 të KDS, gjoba të aplikohet në masën 50%.
Në bazë të nenit 28 të KDS, zbritjen e KF Shkumbini në një kategori më të ulët, në Kampionatin Kombëtar të Futbollit të Kategorisë së Dytë.
Në bazë të nenit 57/2 të KDS, KF Shkumbini, humbet ndeshjen kundër KF Dinamo, në tavolinë me rezultatin 0-3 si dhe i zbriten 3 (tre) pikë nga klasifikimi.
2. Lojtari i KF Shkumbini, Andi Bakiasi, për goditje të përsëritur dhe kërcënim ndaj zyrtarit të ndeshjes, në bazë të nenit 11/f), 48/1/b), 57/1 të KDS, dënohet me përjashtimin përjetë nga çdo aktivitet futbollistik i organizuar nga FSHF.”/Opinion.al/
