“Gaziantepspor është duke zhvilluar kërkimet dhe negociatat për të plotësuar planet e veta në merkato, duke transferuar lojtarë të reparteve të ndryshme, përfshirë edhe prapavijën me sulmin. Vazhdimi i përgatitjeve për sezonin e ri në Bolu nuk i ka penguar drejtuesit e Gaziantepspor që të intensifikojnë përpjekjet për të bërë goditjet e duhura para përfundimit të periudhës së merkatos. Këto përpjekje janë fokusuar kryesisht në transferimin e një portieri dhe sulmuesi. Pas largimit nga ekipi të Karcemarskas, thuhet se portieri shqiptar, Alban Hoxha, do të nënshkruajë javën e ardhshme, duke ofruar siguri për “dorezat”.
Kështu shkruan media turke, “Sabah”, e cila lë të kuptohet se ka tashmë një akord mes dy klubeve, por edhe me njërin nga portierët e kombëtares shqiptare. Nuk dihet sa do të paguajë Gaziantepspor për shërbimet e “gardianit” të të kuqve, por shuma mendohet të jetë tunduese për Partizani. Nëse deri dje përflitej se Gaz Demi kërkonte të paktën 200 mijë euro për ta lënë të lirë portierin, tashmë kjo shifër duket se do të jetë gjysmë milioni. Një biznes shumë i mirë i “demave” në merkaton e kësaj vere, por duhet të mendojnë për pasuesin e kapitenit, edhe pse trajneri Adolfo Sormani i ka edhe dy portierë “nën armë”, Xhikën dhe Dajsinanin.
