“Laguna e patokut prej kohësh është burimi i vetëm ekonomik për banorët e zonës, por vitet e fundit për shkak të prodhimit të ulët të peshkut është kthyer thjesht një bukuri e natyrës.”
Laguna e Patokut ka një sipërfaqe prej 4 200 hektarësh. Faktorë tepër të rëndësishëm në zhvillimin e florës dhe faunës janë: prurjet e detit Adriatik dhe ato të lumit Ishëm. Kjo lagunë njihet për prodhime deti si qefulli, ngjala, gjuhëza, karkaleci e të tjera lloje që u vinë në shërbim vetëm disa bizneseve aty pranë.
Përgjatë gjithë rrugës që të çon drejt lagunës, peshkatarët e zonës kanë varur rrjetat e peshkimit. Dikur varkat qëndronin si karvan mbi ujërat e lagunës, ndërkohë që sot të pakët janë ata që merrem me peshkim. Ata rrëfejnë se më shumë shpenzojnë sesa përfitojnë nga gjuetia e peshkut.
Për një peshkatar puna në lagunë nis që në orët e para të mëngjesit bashkë me lindjen e diellit dhe me shpresën që dita do të jetë e mbarë.
Miklovani, e ruan peshkimin si një traditë familjare të trashëguar brez pa brezi. Me krenari ai rrëfen se dikur ka mundur të peshkojë me kuintalë në lagunë.
Për arsye të peshkimit pa kriter apo në mënyra jo të ligjshme që kanë dëmtuar faunën detare, ai e konsideron veten me fat nëse mundet të kapë qoftë edhe 1 kg. Sot ai e mblodhi rrjetën pa peshk.
Bashkë me perëndimin e diellit që të ofron një pamje mahnitëse në lagunë, mbyllet dhe dita e besnikëve të hershëm të saj, me shpresën se e nesërmja do të jetë me fat.
Klan Plus
