Mediat italiane kanë bërë të ditur se përveç 78-vjeçarit edhe një grua ka humbur jetën si pasojë e virusit vdekjeprurës në Itali.
Bëhet fjalë për një grua në Lombardi, rasti i së cilës mund të jetë i lidhur me ato të Codogno-s. Viktima e parë e shënuar në Itali nga Koronavirusi ishte 78-vjeçari Adriano Travisan, e cili ndërroi jetë në spitalin e Padovës, ku ishte i shtruar së bashku me një person tjetër, gjithashtu I infektuar nga virusi.
Ndërkohë mediat italiane kanë bërë të ditur se numri i të infektuarve deri tani në Itali ka shkuar në 29.
Në spital ndodhet i shtruar një qytetar i njëjtës zonë, i cili i përket bashkisë së Cinto Euganeo. Ky lajm i konfirmua përmes një komunikate zyrtare nga guvernatori i rajonit, Luca Zaia.
Gjithashtu ai theksoi se gjatë ditës së djeshme janë zbuluar edhe dy raste të reja me Koronavirus, të cilët ishin vendas dhe nuk kishin udhëtuar në Kinë, ndërsa bëhet fjalë për një 42-vjeçar dhe një 53-vjeçar.
Autoritetet në Italinë veriore kanë urdhëruar mbylljen e shkollave, restoranteve dhe institucioneve publike, për shkak të një përhapjeje të mundshme të këtij virusi.
Aktualisht në dy rajonet veriore të Italisë Lombardi dhe Veneto numri i prekurve nga virusi i ardhur nga Wuhani ka arritur në 16. Rreth 2360 persona kanë ndërruar jetë nga Koronavirusi në të gjithë botën, ndërkohë numri i të prekurve ka arritur në 78 mijë persona./Opinion.al/
