Ministria e Shëndetësisë ka njoftuar se janë evidentuar 10 raste të reja me koronavirus në Shqipëri duke bërë që numri total i të perkurve të shkojë në 33.
Zv/ministrja e Shëndetësisë, Mira Rakacolli tha një deklaratë për mediat se 10 rastet e fundit të evidentuara u konstatuan pas 159 testimeve të reja të bëra 24 orët e fundit.
“Në 24 orët e fundit janë realizuar edhe 159 testime të reja dhe kjo e çon numrin total të testimeve të kryera në 457. Deri në këto momente janë konfirmuar pozitivë me COVID-19, 33 raste, nga të cilat:
8 prej të cilëve janë të shtruar në spitalin Infektiv (nga Tirana, Durrësi, Fieri dhe Rrogozhina) 25 raste janë të vetëizoluar në gjendje të mirë shëndetësore në shtëpi” njoftoi zv/ministrja.
Rastet e konfirmuara pozitivë janë në: Tiranë 19 raste, Durrës 5 raste (njëri prej të cilëve ka ndërruar jetë), Lushnje 1 rast, Elbasan 2 raste, Fier 4 raste dhe Rrogozhinë 2 raste
Ajo bëri gjithashtu me dije se një nga të prekurit është një mjek i cili nuk ka simptoma.
“Në bazë të rezultateve që tashmë kanë dalë, nga kampioni i dytë i mostrave të marra, 39 mostra të mjekëve, infermierëve dhe pacientëve, vetëm 1 mjek rezulton pozitiv, i cili nuk ka simptoma, aktualisht është i vetëizoluar dhe po hulumtohet më tej. Gjithsej janë kryer 89 testime në spitalin e Durrësit.Nga numri total i të prekurve nga COVID-19 janë 25 persona të vetëizoluar në gjendje të mirë shëndetësore dhe 177 të vetëkarantinuar”, shtoi ajo.
Shefja e Departamentit të Epidemiologjisë dhe Kontrollit të Sëmundjeve Infektive në Institutin e Shëndetit Publik, Silva Bino tha se tashmë që OBSH ka shpallur pandeminë na koronaviriusi masat që janë marrë duhet të merren seriozisht.
“OBSH ka shpallur pandeminë nga koronavirusi i ri që do të thotë se bota ka transmetim komunitar në më shumë se 2 kontinente. Kjo është një situatë që duhet vlerësuar me seriozitet dhe masat që janë marrë për distancimin social duhet të merren me seriozitet. Ne do të vazhdojmë me gjurmimin e rasteve në terren dhe nuk është e nevojshme që çdo person të testohet”, tha Bino. /Opinion.al
