Numri i të vdekurve, si pasojë e tërmetit shkatërrimtar 7.7 ballë, në Turqi dhe Siri deri tani ka shkuar në mbi 500 persona.
Shifra është rritur me rreth 200 viktima në pak më shumë se 30 minuta.
Fakti që tërmeti goditi në orët e para të mëngjesit, teksa njerëzit ishin në gjumë, ka sjellë më shumë viktima se sa mund të kishin qenë gjatë ditës.
Zëvendëspresidenti turk Fuat Oktay tha në një konferencë për shtyp se numri i të vdekurve në Turqi ishte tani 284, me 2,323 të plagosur.
Ai tha se 70 persona u vranë në provincën e Kahramanmaras, ku ndodhej epiqendra e tërmetit, së bashku me 20 persona në Osmaniye, 18 në Sanliurfa, 14 në Dijarbakir dhe 13 në Adiyaman.
Ndërkohë numri i të vdekurve në Siri është 237 – dhe ky është vetëm në zonat e kontrolluara nga qeveria.
