Nga Aldo Baxhaku –
Situata për nisjen e vitit të ri shkollor vijon të mbetet e paqartë, pa një vendim konkret nëse shkollat do të hapen dhe si parashikohet të ndodhë kjo gjë. Në një komunikim “online”, dy ministret Manastriliu dhe Shahini thanë se ende janë duke u vlerësuar mundësitë.
U tha se shkollat do të hapen në varësi të madhësisë së tyre dhe se po parashikohet të ndahen klasat në grupe. Kur duhet më pak se një muaj nga data 14 shtator, e paracaktuar për nisjen e vitit shkollor, ende nuk ka një vendim sa është madhësia e shkollave që do të hapen, sa nxënës do të ketë një klasë, sa do të zgjasë ora mësimore, me sa turne do të punohet.
Ministret thanë se detajet janë ende duke u përpunuar, që do të thotë se ende nuk janë gati dhe rrezikojnë të dalin pak para nisjes së shkollës.
Për të vënë në zbatim një plan të tillë që do të riorganizonte të gjithë strukturën e funksionimit të insitutcioneve arsimore duhet kohë, në të kundërt ose shkolla do nisë me vonesë ose masat nuk do të zbatohen siç duhet.
Prandaj, shprehja “shkollat do të hapen”, nuk ka vlerë dhe madje bie në kundërshtim me atë që vetë qeveria thotë se “çdo vendim për hapjen e shkollave po koordinohet me përgjegjësi maksimale nga institucionet përgjegjëse për garantimin e masave të distancimit social dhe sigurisht duke vlerësuar në dinamikë situatën epidemiologjike”.
Cikli i paqartësisë vijon edhe këtu. Kush janë institucionet përgjegjëse për garantimin e masave dhe distancimit? Pse nuk thuhen me emra cilat janë këto insitucione të cilat do të marrin këtë vendim kaq të rëndësishëm?
Deri tani, dimë që policia është ajo që gjobit kur nuk mbahet maska. Policia është duke u konsultuar për hapjen e shkollave?
Qytetarëve po iu bëhet thirrje ditë e natë të zbatojnë masat se gjithçka varet nga sjellja e tyre. Qytetarët po konsultohen për hapjen e shkollave?
Mesa dimë, deri tani jo. Dimë vetëm që mësuesve iu është komunikuar me mesazh në celular kur të paraqiten në punë. Pa i pyetur askush e pa marrë nga ata asnjë lloj mendimi.
Gjëja tjetër që po na thuhet, është se ky është një vendim, që nuk është marrë kudo njësoj. Vende të ndryshme e kanë gjetur ndryshe zgjidhjen, sipas situatës së tyre epidemiologjike.
Dakord, pra edhe vendimarrja për hapjen e shkollave të merret bazuar në situatën e pandemisë në vendin tonë. Nga ana tjetër në po të njejtën dalje “online” ministrja e Shëndetësisë tha:
“Nga vlerësimet sistemike të kryera nga Qendra Europiane e Parandalimit dhe Kontrollit të Sëmundjeve, rezulton se transmetimi i sëmundjes në shkolla ka qenë i rrallë dhe nëse merren masat e duhura të distancimit fizik, higjenës dhe masa te tjera, ato kanë pak gjasa që të jenë mjedise efektive të shtimit të transmetimit të virusit, më shumë se sa vendet me densitet të njëjtë të njerëzve, si psh. në vendet e punës apo vendet argëtuese”.
Së pari, ECDC-ja është një qendër e specializuar në analizimin e të dhënave kryesisht për vendet e BE por edhe brenda BE ka qasje dhe vendimarrje të ndryshme sa i përket hapjes së shkollave. Pra të ecim jo sipas situatës sonë po sipas vlerësimit të ECDC-së për vende jo si i yni.
Të thuash që transmetimi i sëmundjes në shkolla ka qenë i rrallë, në një periudhë kur shkollat kanë qenë të mbyllura dhe kur pandemia ka qenë në një faze krejt tjetër nga kjo aktuale, tregon paqartësi të thellë.
Akoma më shqetësues është fakti tjetër që nuk merret në konsideratë, që të rinjtë janë transmetuesit kryesorë të virusit aktualisht.
OBSH-ja dhe jo vetëm, kanë më shumë se një muaj që përsërisin thirrje dhe apele për të rinjtë.
Ne na thuhet se në ambjentin ku të rinjtë socializohen më shumë nuk ka rrezik të përhapet virusi. Mos vallë kujtojnë se nxënësit nga shtëpia në klasë zhduken si me buton?
Harrojnë të gjitha takimet dhe bisedat që ndodhin para, ndërmjet dhe pas orëve të mësimit?
Nëse shkolla është hapësirë e sigurt për mos përhapjen e virusit kur zbatohen rregullat atëherë çfarë duhet të themi për spitalet. Aty ku masat mbrojtëse janë më të mirat. Ato që u kthyen në vatrat kryesore të shpërthimit të virusit.
Gjithmonë është thënë se mjeku u infektua nga pakujdesia. E kur një mjek, i përgjegjshëm e që e di rrezikun që po lufton, ndodh të jetë i pakujdesshëm, le të imagjinojmë si do të jenë nxënësit e shkollave nga klasa e parë deri në të 12. Apo do i ruajnë me policë? /Opinion.al
