Teksa na ndajnë vetëm pak ditë nga zgjedhjet vendorë të 14 Majit, një audiopërgjim është publikuar në media ku shfaqet kryetarja aktuale dhe njëkohësisht kandidatja e PS për bashkinë Roskovec, Majlinda Bufi.
Bufi është regjistruar teksa ka thirrur në zyrën e saj sanitaren e një shkolle 9-vjeçare, e cila ka marrë pjesë në një nga takimet e ish-kryeministrit, Sali Berisha, në Roskovec.
Në regjistrimin e shfaqur në emisionin ‘Piranjat’ në Syri Tv, kryebashakiakja këshillon pastruesen që të mos bëhet target i njerëzve që merren me thashetheme, ndërsa i thotë se pjesëmarrja në mitingun e Berishës është mosmirënjohje ndaj saj që e ka marrë në punë.
Kryetarja gjatë regjistrimit ndër të tjera pyetet nga gazetarja nëse i ka thënë stafit të marrë pjesë në takimin e Ramës, ndërsa përgjigjet se nuk e di se çfarë mesazhi u është dërguar vartësve të saj.
Në përfundim të regjistrimit Bufi kërkon që materiali të mos transmetohet. “Të lutem mos e transmetoni sepse më prish punë. Do e japësh? Me kë të flas unë? Si e ke emrin ti? Mos e jep njerëzisht ta kërkoj”-thotë ajo.
Pasi kupton që përgjimi do të transmetohet, kryebashkiakja e Roskovecit thotë se nuk dilet në fushatë gjatë orarit të punës./Opinion.al
