31-vjeçari Dorian Licaj, u nis me biçikletë më 30 Prill nga Marina di Ragusa, ku ishte mysafir i kushërinjve të tij dhe prej asaj nate rezulton i zhdukur.
Të afërmit e tij denoncuan zhdukjen në polici teksa treguan se ai kishte me vete dokumente shqiptare dhe një celular të cilin e ka të fikur, por pa dhënë detaje të tjera si përshembull rrobat që mbante veshur kur u largua nga banesa.
Ata e kanë përshkruar të afërmin e tyre si një njeri që vuante nga ankthi, ndërsa shtojnë se para se të largohej kishte lënë një letër ku kërkonte falje për vuajtjet që do u shkaktonte njerëzve të familjes lidhur me veprimin që po bënte, dhe që sipas tyre është pikërisht vetëvrasja.
Policia e zonës ka nisur kërkimet e pandërprera, ndërsa ka publikuar dhe fotografinë e shqiptarit, duke iu kërkuar qytetarëve italianë të lajmërojnë nëse e shohin diku.
Mediat italiane shkruajnë se Licaj ndodhej në Itali prej muajit janar dhe ishte në kërkim të një vendi pune./Opinion.al
