Një rast i çuditshëm është raportuar nga mediat greke. Raportohet se një 13-vjeçare në Greqi, ka shkuar me dhimbje të forta barku në spital dhe më pas ka lindur një fëmijë pa ditur se ajo ka qenë shtatzënë.
Mësohet se 13-vjeçarja është dërguar në spital nga prindërit e saj. Në urgjencën e spitalit e mitura u trajtua për kapsllëk kronik. Pediatri i dha një klizmë për t’u qetësuar, siç është përshkruar në këto raste.
Mjeku pasi pa vonesën e vajzës e cila kishte shkuar në tualet, shkoi dhe e gjeti atë me foshnjën e lindur dhe kordonin e kërthizës së varur.
Më pas, 13-vjeçarja i është nënshtruar një radiografie për të parë nëse ka ndonjë komplikacion dhe në mungesë të mjekut gjinekolog është transferuar në spitalin e Siros, ku po trajtohet me foshnjën e saj.
“Fëmija duhet të kuptojë se jeta e saj po ndryshon. Ajo është e tmerruar, por po monitorohet nga psikologët e fëmijëve. Imagjinoni një fëmijë të thotë se i dhemb barku dhe më në fund të lindë. Vajza e vogël lindi pasi shkoi në tualetin e spitalit”, tha një i afërm i 13-vjeçares.
Sipas medias “Mega” e mitura u ka treguar psikologëve të fëmijës se babai i vogëlushit është një shok i klasës së saj.
“Jemi në shok pasi vajza e vogël kishte vizituar një pediatër gjatë shtatzënisë, por askush nuk e kishte kuptuar që ajo ishte shtatzënë”, shtoi ai më vonë.
“Kohët e fundit kishim vënë re se ajo kishte shtuar pak peshë por ia atribuonim kilogramëve të tepërt në adoleshencë”, tha i afërmi i vajzës.
