(Foto ilustruese)
Ka përfunduar në pranga një i ri që ishte shndërruar në tmerrin e femrave në Shkodër, pasi i gjente në befasi dhe i grabiste me dhunë.
Policia bën me dije se grabitja e fundit e një kalimtareje i ka zbuluar edhe serinë e grabitjeve të tjera që ai kishte kryer.
“Në pranga u vu shtetasi Besmir Zalli, 31 vjeç, banues në Shkodër”- njofton polica.
Sipas saj, nga veprimet e shpejta hetimore të kryera u bë e mundur zbardhja dhe dokumetimi i ngjarjes së ndodhur ku rezultoi se shtetasi i lartpërmendur dyshohet se është autor i vjedhjes me dhunë ndodhur më datë 24.03.2017 rreth orës 19:30 në lagjen Vasil Shanto Shkodër.
“Dyshohet se ky shtetas i ka vjedhur me dhunë çantën shtetases V. P, 46 vjeçe, banuese në Shkodër”- thotë policia.
Gjithashtu nga veprimet hetimore rezultoi se ky shtetas dyshohet të jetë autor edhe i dy ngjarjeve të tjera të ndodhura më parë dhe konkretisht:
Autor i dyshuar i ngjarjes së ndodhur më datë 07.02.2017, ku shtetases P A, 64 vjeçe, dyshohet se i ka vjedhur me dhunë një varëse floriri nga qafa.
Si dhe më datë 11.02.2017 dyshohet se i ka vjedhur me dhunë çantën e dorës shtetases K. B, 58 vjeçe banuese në Shkodër.
Materialet i kaluan Prokurorisë së Rrethit Gjyqësor Shkodër për veprën penale “Vjedhje me dhunë” e parashikuar nga neni 139 i Kodit Penal.
