Vijon të paraqitet problematike situata me përmbytjet në qarkun e Shkodrës, ku raportohen 1400 ha tokë nën ujë, sipërfaqe kjo e rritur me 60 ha krahasuar me pasditen e djeshme.
Sipas përditësimit më të fundit nga Bashkia Shkodër, 15 banesa në fshatin Obot kanë prezencë uji në oborre dhe rruga Shirq-Darragjat është e pakalueshme.
Sakaq, Rruga e Obotit ka prezencë uji 65 cm, dhe në këtë aks po operojnë dy mjete të kalueshmërise së lartë së bashku me 7 forca të ushtrisë.
Njoftimi i plotë:
Situata në Bashkinë Shkodër, në orën 08.00 të datës 23.01.2023 paraqitet si më poshtë:
Niveli i lumit Drin (hidrometri ura e Bahçallëkut) shënon kuotën 5.85 ka rënie me 45 cm me orën 18.00 të datës 22.01.2023 ( kuota max 7.50 m ).
Niveli i Liqenit ( hidrometri ura e Bunës) shënon 8.40 m ka rënie prej 10 cm me orën 18.00 të datës 22.01.2023 ( kuota max 8.70 m ).
Sipërfaqja totale e përmbytur në Bashkinë Shkodër është 1400 Ha, e rritur me 60 Ha me orën 18.00 te dates 22.01.2023.
Njësia Administrative Ana e Malit 1300 Ha e përmbytur. Rruga e Obotit ka prezencë uji 65 cm, ka rënie me 15cm me orën 18.00 e datës 22.01.2023. Ujësjellësi Oblika 1 është jashtë funksionit. Ka prezencë uji në oborre në 15 banesa të fshatit Obot, nga 30 banesa që ishin në orën 18.00 të datës 22.01.2023. Në rrugën e Obotit po operojnë dy mjete të kalueshmërise së lartë së bashku me 7 forca të ushtrisë.
Njësia Administrative Dajç 100 Ha tokë bujqësore. Në vendin e quajtur Urrelat e Shirqit , rruga Shirq-Darragjat ka prezencë uji në rrugë 30 cm, për momentin rruga është e pakalueshme me mjete, ka rënie të nivelit prej 40 cm. Grupet e EC të Bashkisë Shkodër janë në monitorim të vazhdueshëm të situatës./Opinion.al
