Shpërndarja e materialeve të votimit ka vazhduar sot në të gjithë vendin. Megjithatë në Shkodër duket se procesi vazhdon të hasë vështirësi.
Kryetarja e Bashkisë Voltana Ademi kishte deklaruar se nuk do të lejonte që ambientet e administruara nga Bashkia Shkodër të përdoreshin si qendra votimi.
Sot në disa shkolla policia e shtetit është përballur me dyer të mbyllura të shkollave ku ishte planifikuar të kryheshin votimet. Në shkollën ‘Jordan Misja’, në të cilën janë planifikuar për tu ngritur 2 KZAZ dera është mbyllur me zinxhirë. E njëjta situatë raportohet në shkollën “Edith Durham” por aty kanë ndërhyrë disa mbështetës të Partisë Socialiste duke e hapur forcërisht. Pasi u hap dera kryesore në ambientet e shkollës brenda janë futur edhe materialet zgjedhore.
Në lidhje me këto ngjarje Bashkia Shkodër ka reaguar përmes një deklarate në të cilën dënon thyerjen e urdhrit të kryetares Voltana Ademi.
“Në cilësinë e kryetares së Bashkisë së Shkodrës, denoncoj publikisht ndërhyrjen e jashtëligjshme në institucionet në pronësi të qeverisjes vendore nga ana e Policisë së Shtetit”
Ajo i cilëson këto akte “të pastra diktatorialo-politike” dhe se po dhunojnë vlerat demokratike.
Deklarata e bashkisë Shkodër
E indinjuar për mosrespektimin e urdhërit tim në lidhje me ambientet publike në pronësi të Bashkisë Shkodër nga KQZ-ja, urdhër i bazuar në Kushtetutë, Dekretin e Presidentit të Republikës, Ligjin 139/2015 “Për vetëqeverisjen vendore”. Në cilësinë e kryetares së Bashkisë së Shkodrës, denoncoj publikisht ndërhyrjen e jashtëligjshme në institucionet në pronësi të qeverisjes vendore nga ana e Policisë së Shtetit.
Këto veprime të pastra diktatorialo-politike, për hapjen e dhunshme me thyerje e dëmtim të institucioneve publike, po dhunojnë haptas dhe ditën për diell vlerat demokratike. Gjithashtu janë duke njollosur të drejtën e votës së lirë, të pa manipuluar, të barabartë apo të blerë nga mafia.
Ne po monitorojmë dhe dokumentojmë hap pas hapi të gjitha këto akte të pakuptueshme ndaj pronave të qeverisjes vendore dhe po informojmë institucionet vendase dhe të huaja, si OSBE-ODIHR.
Ne kemi qenë, jemi dhe do të vazhdojmë të punojmë e luftojmë për një Shqipëri brenda familjes Europiane, e cila dinjitetin dhe lirinë e personit njerëzor i vlerëson shtylla të zhvillimit. /Opinion.al
