Drejtori i një shkolle 9-vjeçare në fshatin “Hot i Ri” në Shkodër është arrestuar nga policia.
Autoritetet bëjnë me dije se 54 vjeçari Gjovalin Kodra, dhe bashkëpunëtori i tij Gjin Fusha janë arrestuar pasi janë kapur në flagrancë duke lëshuar diploma gjimnazi në këmbim të rryshfetit të shumës 3200 euro.
Nga veprimet hetimore të kryera në kuadër të këtij operacioni, dyshohet se këta shtetas bashkëpunonin me njëri-tjetrin, për të falsifikuar dëftesa, duke përdorur vulën e falsifikuar të shkollës së mesme në fshatin Breg Lumi, dhe për të pajisur me këto deftesa, shtetas të ndryshëm.
Policia bën me dije se në cilësinë e provës materiale, u sekuestruan 26 dokumente shkollore të paplotësuara, por të pajisura me vulën e shkollës së mesme, vula e shkollës 9-vjeçare, 5 USB, 1 celular, si dhe shumat e parave 640 euro dhe 16 000 lekë, të dyshuara të përfituara nga kjo veprimtari kriminale.
Vijojnë veprimet hetimore për të identifikuar dhe nxjerrë përpara përgjegjësisë penale shtetasit e tjerë që mund të jenë të implikuar në këtë rast.
