Koronavirusi do të jetë prezent përgjithmonë, në një formë apo një tjetër. Është kjo deklarata që jep një nga anëtarët e grupit këshilltar të emergjencave pranë qeverisë britanike.
Për këtë arsye, sir Mark Walport tha se njerëzit do të duhet të vaksinohen në intervale të rregullta. Komenti i tij vjen pasi deklaratave nga OBSH se pandemia do të përfundojë brenda dy vitesh, ashtu sikurse dhe gripi spanjoll.
Sir Mark thotë se densiteti i popullsisë dhe mjetet e lëvizjes e shpërndajnë më lehtë virusin. Ai shton se popullsia gjithashtu është më e madhe se sa ishte në 1918. Duke folur në “BBC Radio 4” ai shtoi se në mënyrë që të mbahet nën kontroll pandemia do të duhet vaksinim global.
“Ky është një virus që do të qëndrojë me ne përgjithmonë në një formë a një tjetër, dhe do të kërkoje vaksinim të përsëritur. Pak a shumë si gripi, njerëzve do t’u duhet të vaksinohen në intervale të rregullta”, u shpreh ai.
Tedros Adhanom Ghebreyesus, kreu i OBSH tha se gripit spanjoll iu deshën dy vite të largohej dhe me teknologjinë e avancuar që kemi, bota mund ta largojë koronavirusin më shpejt.
Gripi në 1918 mori 50 milionë jetë. Korornavirusi deri tani ka shkaktuar 800,000 viktima dhe rreth 23 milionë persona janë infektuar. Megjithatë mendohet se numri i të prekurve është më i lartë, sepse ka raste asimptomatike dhe të patestuara.
Sir Mark paralajmëron se është e mundur që koronavirusi të dalë sërish jashtë kontrollit, duke shtuar se tashmë mund të përdoren masa parandaluese në vend të një mbylljeje totale.
Ai tha se është i shqetësuar për rritjen e numrave në Europë dhe në vende të tjera të botës./Opinion.al
