E pranishme në Komisionin e Kuvendit për Veprimtarinë Prodhuese Tregtinë dhe Mjedisin, Zv.ministrja e Shëndetësisë dhe Mbrojtjes Sociale, Mira Rakacolli ka paralajmëruar të gjitha subjektet të cilat nuk respektojnë protokollin për mbrojtjen ndaj COVID-19.
Rakacolli tha se në këtë periudhë pandemie hapja e sezonit turistik e shton rrezikun e pandemisë dhe për këtë arsye duhet zbatohen të gjitha masat anti-COVID.
Zv.ministrja u shpreh se në kuadër të një akti normativ të propozuar parashikohet të penalizohen subjektet që ushtrojnë veprimtari turistike në stacionet e plazhit dhe që nuk respektojnë protokollet e sigurisë.
Ajo tha se dënimi me gjobë do të jetë 700 mijë lekë, ndërsa në rast përsëritjeje iu shtohet edhe mbyllja e veprimtarisë nga inspektoratet përgjegjëse
“Në aktin normativ të propozuar nuk janë parashikuar penalitete për ato subjekte apo struktura që ofrojnë shërbim turistik. Nëpërmjet këtij akti normativ parashikohet të penalizohen subjektet që ushtrojnë veprimtari turistike në stacionet e plazhit dhe që nuk respektojnë rregullat dhe protokollet e sigurisë, të nxjerra nga organet kompetente, me dënimin me gjobe 700 mijë lekë dhe, në rast përsëritjeje, iu shtohet edhe mbyllja e veprimtarisë nga inspektoratet përgjegjëse, duke synuar kështu të mbrohet shëndeti i turistëve në zonat e plazheve nga infeksioni Covid-19 si edhe mjedisi”- deklaroi Rakacolli.
Zv.ministrja bëri të ditur se, në datën 5 korrik janë kryer 619 inspektime në shkallë vendi për respektimin e protokolleve të masave antiCovid dhe për shkeljet e evidentuara janë marrë 6 masa administrative, dy në vlerën e 1 milion lekëve dhe 2 në vlerën e 100 mijë lekëve.
Rakacolli informoi komisionin se, në kuadrin e masave të mbrojtjes kundër Covid-19 aktiviteti i pishinave vijon të jetë i mbyllur në të gjithë vendin me urdhër të Ministrisë së Shëndetësisë, deri në një vendim tjetër. Ndërsa inspektorët e shëndetësisë, tha ajo vijojnë kontrollet për dezifektimin e hapsirave në zonat turistike të vendit./ Opinion.al
