Protestuesit që hoqën flamurin turk nga HEC në Mirditë do të ndiqen penalisht. Prokuroria e qarkut të Lezhës që ka nën juridiksion edhe Mirditën tha se në bazë të referimeve nga Policia e Shtetit, ka nisur procedimet në gjendje të lirë për rreth 60 persona.
Katër ditë më parë protestuesit u mblodhën në digën e hidrocentralit të Qafë Mollës, duke prishur flamurin turk, që ishte vendosur në mënyrë murale nga firma turke që ka ndërtuar hidrocentralin mbi lumin Fan.
Midis personave të proceduar, 10 prej tyre përveç akuzës për tubim të paligjshëm, akuzohen edhe për kundërshtim të punonjësve të policisë dhe shkatërrim të pronës.
Protesta për vendosjen e flamurit turk në digën e hidrocentralit u lajmërua në rrjetet sociale nga disa persona, të cilët e konsiderojnë fyerje për gjithë krahinën e Mirditës, vendosjen e flamurit turk në këtë zonë.
