Në orët e para të mëngjesit të sotëm, karabinierët në Frosinone të Italisë arrestuan 23 persona si të dyshuar të përfshirë në një rrjet trafiku dhe shpërndarjeje droge.
Nga këta 5 persona përfunduan në burg, 8 në arrest shtëpiak, 7 me detyrim të qëndrimit në komunën e vendbanimit dhe 1 në provincën e Frosinone.
Operacioni Amnesia filloi nga denoncimi i një biznesmeni nga Pofi, viktimë e gjobave, i cili ishte kërcënuar së bashku me familjen dhe ishte detyruar të vepronte si korrier për organizatën për të shlyer një borxh që i kishte grupit ku kishte blerë drogë.
Në krye të organizatës, ishte shqiptari Altin Prendi, 32 vjeç, që jetonte në Frosinone i cili ndihmohej nga Albi Aliu banues në Ferentino, Alfred Çela me vendbanim në Romë dhe Dik Tafa, 33-vjeçar banor i Frosinone. Pjesë e grupit ishin italianë dhe shqiptarë dhe ndër ta kishte edhe gra.
Sipas autoriteteve italiane, grupi lëvizte një sasi droge me vlerë 300 mijë euro në çdo ngarkesë. Rrezikshmëria e të dyshuarve gjithashtu del nga masat sistematike që merrnin për të shmangur kontrollet nga policia; transporti i lëndës narkotike, kur bëhej fjalë për në sasi të mëdha, bëhej me dy vetura, njëra prej të cilave i paraprinte tjetrës për të paralajmëruar pikat e kontrollit të mundshëm. Transporti publik përdorej gjithashtu për tu përzier me pasagjerët dhe shpesh herë ndryshohej vendi i takimet dhe atyre u caktoheshin gjithnjë kode të ndryshëm, për tu mbrojtur nga ata që mund të ishin duke i përgjuar.
Gjatë arrestimit atyre iu konfiskuan mbi 15 mijë euro dhe 7 kg lëndë narkotike, kokainë dhe kanabis. /Opinion.al
