Sekretari amerikan i Mbrojtjes, Mark Esper shkarkoi nga detyra shefin e Marinës amerikane Richard Spencer për shkak të një rasti disiplinor që përfshin pjesëtarin e Marinës, Edward Gallagher.
Gallagher, i cili është dënuar për daljen në fotografi me një kufomë, ka shkaktuar tensione midis presidentit amerikan Donald Trump dhe zyrtarëve ushtarakë.
Ai duhet të përballet me një rishikim disiplinor që mund ta privojë nga anëtarësimi në marinë.
Megjithatë ka raporte të ndryshme se përse i është kërkuar Spencerit të japë dorëheqje.
Esper tha se e ka humbur besimin te sekretari i Marinës sepse bisedat e tij private me Shtëpinë e Bardhë bien në kundërshtim me pozicionin e tij publik.
Megjithatë, Trump tha se nuk ishte i kënaqur me mënyrën se si është zhvilluar gjyqi i Gallagherit dhe la të kuptohet se kjo është arsyeja për shkarkimin e Spencerit.
Spencer në anën tjetër tha se është e qartë se ai dhe Trump nuk kanë mendime të njëjta për “rendin dhe disiplinën e mirë”.
Gallagher është akuzuar për therjen për vdekje të një të burgosuri 17 vjeçar të grupit militant “IS” dhe për hapje të zjarrit kundër civilëve në kohën kur ka qenë duke shërbyer në Irak në vitin 2017.
Ai është liruar nga këto akuza dhe është dënuar vetëm për akuzën e daljes në fotografi me kufomën e të burgosurit të ‘IS’.
Për këtë i është ulur pozicioni, por më pas presidenti Trump më vonë i ka rikthyer gradën.
Gallagher është njoftuar nga drejtuesit e Marinës javën e kaluar se do të përballet me një rishikim disiplinor, i cili mund të rezultojë deri në heqjen e anëtarësimit të tij në Marinë.
