Është shkarkuar nga detyra drejtoresha e Qendrës së Shërbimeve Arsimore, Rezana Vrapi.
Mësohet se vendimi është firmosur ditën e sotme, raporton “News24”. Vrapi është shkarkuar nga detyra nga ministrja e Arsimit Evis Kushi.
Rezana Vrapi, ka drejtuar për 7 vite Qendrën e Shërbimeve Arsimore. Ajo u emërua në këtë post në vitin 2014, ndërsa ende nuk dihen arsyet e shkarkimit apo largimit të saj nga drejtimi i QSHA-së.
Por vlen për tu përmendur se institucioni i cili drejtohej nga zonja Vrapi ka qenë shpesh në qendër të kritikave në lidhje me testet e Maturës Shtetërore.
Edhe këtë vit maturantët dolën në protestë para Ministrisë së Arsimit pasi bënë testin e Matematikës. Shumë prej tyre thanë se teza mbante pyetje të temave që nuk ishin zhvilluar gjatë orëve mësimore.
Kujtojmë se protestat e maturantëve u ndalën pasi ministrja e Arsimit, Evis Kushi, pranoi të gjitha kërkesat e tyre./Opinion.al
