Presidenti Ilir Meta pranon të dëshmojë në Komisionin Hetimor, i cili është ngritur për të hetuar shkeljet e tij, ndërsa deputetët e PS-së kërkojnë shkarkimin. Në një postim në rrjetet sociale Meta shkruan Presidentit i takon të jetë shembull i bashkëpunimit institucional.
“Dhe besoj se në këto dy vite kam bërë gjithçka për vendosur këtë bashkëpunim, në respekt të plotë të Kushtetutës, shtetit ligjor dhe interesit publik”, thekson Meta. Por mesazhi i fshehur i tij është fjalia e fundit e postimit, teksa thekson se mezi pret të kthehet në Parlament.
Komisioni hetimor parlamentar i cili do të vlerësojë ligjshmërinë e akteve të presidentit Ilir Meta për anullimin e datës së zgjedhjeve vendore të 30 Qershorit miratoi të martën planin e tij të veprimit.
Pika e parë është seanca dëgjimore me kreun e Shtetit. “Data më e shpejtë mund të jetë fillimi I javës së ardhshme, por datën dhe orën do ta caktojmë në bashkëpunim me nënkryetarin”, deklaroi drejtuesi i Komisionit, socialisti Ulsi Manja.
Komisioni ka marrë në ndërkohë përgjigjet e disa institucioneve të cilave ai është drejtuar, por duket se vendimtar do të jetë opinioni i Komisionit të Venecias. Një delegacion i tij ka paralajmëruar një vizitë javën e ardhshme në Tiranë.
“Opinioni i Komisionit të Venecias, do të duhet të pritet nga Komision i Posaçëm hetimor, për të arritur në një përfundim lidhur me objektin e hetimit”, shpjegoi Manja. Komisioni ka afat deri më 8 tetor, por nëse opinioni i Venecias do të publikohet përtej kësaj date, atëherë pritet të kërkohet shtyrja e afatit./ Opinion.al
