Dhoma e Përfaqësuesve të SH.B.A.-së ka miratuar një rezolutë për të proceduar zyrtarisht për shkarkimin e Presidentit Donald Trump.
Deri tani, komisionet e Dhomës së Përfaqësuesve për Zbulimin, Marrëdhëniet me Jashtë dhe Mbikqyrjen kanë dëgjuar dëshmi me dyer të mbyllura nga diplomat dhe zyrtarë të tjerë, por sipas kësaj rezolute faza e ardhshme e hetimeve do të jetë më publike dhe rolin kryesor në seanca do ta ketë udhëheqësi i Komitetit të Inteligjencës në Dhomën e Përfaqësuesve, Adam Schiff.
Më pas Komisioni i Zbulimit t’i dorëzojë një raport me përfundime dhe rekomandime Komisionit Juridik të Dhomës së Përfaqësuesve, që do t’i rekomandojë gjithë Dhomës së Përfaqësuesve nëse duhet mbajtur votimi për shkarkim apo jo.
“Po e ndërmarrim këtë hap për të eliminuar çdo dyshim nëse administrata e Presidentit Trump mund të bllokojë dokumenta, të pengojë dëshmitarët, të shpërfillë thirrjet e autorizuara për detyrim paraqitjeje, apo të vazhdojë të pengojë Dhomën e Përfaqësuesve”, tha kryetarja e Dhomës së Përfaqësuesve, Nancy Pelosi në një letër për ligjvënësit demokratë.
Kujtojmë se presidenti amerikan, Donald Trump akuzohet se i ka bërë presion Ukrainës për të kryer hetime për korrupsion kundër rivalit të tij politik, Joe Biden dhe djalit të tij, Hunter, i cili ka punuar në një kompani ukrainase të gazit, Burisma.
Trump i ka cilësuar hetimet për shkarkim si “gjueti shtrigash”, ndërkaq sipas Kushtetutës amerikane, Dhoma e Përfaqësuesve ka fuqi për të shkarkuar presidentin për “shkelje të rënda dhe keqbërje”.
Kjo është hera e katërt në historinë amerikane që ka nisur një procedurë për shkarkim të presidentit, ndonëse asnjëri prej presidentëve nuk është larguar nga posti përmes këtij procesi./Opinion.al
