Ditën e sotme është mbledhur Komisioni Hetimor për shkarkimin e presidentit Ilir Meta, ku do të shqyrtohen veprimet apo mosveprimet e kreut të shtetit sa i takon dekretit të zgjedhjeve.
Ulsi Manja, kreu i këtij komisioni është shprehur se gjate mbledhjes do të diskutohet për dy raportet e Komisionit të Venecias, për paraprakun dhe përfundimtarin.
Kërkesa për shkarkim është bërë nga maxhoranca, kur Meta vendosi që të shtyjë datën e zgjedhjeve, duke zhdekretuar 30 qershorin.
Por, nënkryetari i këtij komisioni, Alban Zeneli, përfaqësues i opozitës në Kuvend ka theksuar se ky komision duhet të marrë një vendim sa më shpet, ndërsa shtoi se nuk do të bëhet pjesë pazareve të kryeministrit Edi Rama.
“Kjo është seancë e rëndësishme, pasi po hetojmë për herë të parë në historinë e pluralizmit shqiptar, një president. Ky komision duhet të jetë shumë i kujdesshëm. Është më e qenësishme integritet i këtij komisioni, sesa çdo lloj vendimi që duhet të marrë. Gjej rastin t’ju them se ka një arsye dhe qëllim që është ngritur ky komision. Jemi pak të vonuar, pasi ne kemi pasur kohë të mjaftueshme që ai qëllim që është ngritur ky komision, duhet të kishte mbaruar më herët. Rama ka dalë para Kuvendit dhe ka thënë; ‘që ai nuk e meriton atë pozicion që ka’. Ne sa më parë, administrimin e këtyre dokumenteve që na kanë ardhur, t’i shqyrtojmë që sot dhe të dalim në një vendim të prerë, se nëse e ka shkelur Presidenti Kushtetutën apo jo. S’do të bëhem pjesë e asnjë retorike apo pazari që doni të bëni me presidentin e Republikës. Ndaj, dua nga ju që një orë e më përpara të marrim në shqyrtim të gjitha informacionet e ardhura nga institucionet. Rama bashkë me drejtues politikë të PS, kanë dalë para opinionit publik dhe kanë thënë; se presidenti nuk e meriton të qëndrojë në atë zyrë.”Opinion.al
