Kryetari i komisionit hetimor për shkarkimin e Presidentit, deputeti Alket Hyseni tha se procedura e shkarkimit ka qenë e kushtëzuar nga shkeljet kushtetuese.
Në një debat me analistin Artu Zheji në “Opinion”, Hyseni ka listuar një sërë shkeljesh, ndërsa Zheji tha se nisma ishte politike.
“Ne jemi në rastin kur jemi të kushtëzuar për ta nisur këtë proces, sepse shkeljet e Kushtetueës në gjykimin tonë dhe të parlamentit të mbështetur në 104 vota është fakti që presidenti ka kryer disa shkelje të Kushtetutës dhe janë disa shkelje të rënda:
Ka shkeljen e parimit të unitetit të popullit
Ka shkeljen e betimit
Ka shkelje që lidhen me procesin zgjedhor
Ka shkelje që lidhen me marrëdhëniet me partnerët tanë strategjikë
Ka shkelje që lidhen më pavarësinë dhe funksionimin e institucioneve
Ka shkelje që lidhjen me rendin dhe sigurinë publike
Një tërësi shkeljesh të cilat nuk na lejojnë të marrim aksione politike sipas dëshirave dhe favoreve”, u shpreh Hyseni.
I pyetur nga gazetari Blendi Fevziu se si do të veprohet nëse Gjykata Kushtetuese e merr të mirëqenë raportin dhe nëse në zgjedhjen e presidentit të ri do të vendosë parlamenti i ri apo ky aktual, Hyseni tha: “Në varësi të kohës se kur merret vendimi mund të parashikohet ky aspekt. Nëse gjykata vendos shpejt, ky parlament fillon procedurat për zgjedhjen e presidentit të ri, sepse Kushtetuta parashikon që brenda 10 ditësh fillon procesi. Ky proces është strikt kushtetues, sepse hapat janë të përcaktuatra dhe të kushtëzuara”./Opinion.al
