Mjekë dhe infermierë kanë dalë sot në protestë pas shkarkimit të kolegut të tyre, mjekut të Urgjencës Kombëtare Mjekësore Ilir Allkja.
Pak minuta më herët ata janë mbledhur para Urgjencës për të shprehur indinjatën e tyre për vendimin e QSUT.
Ndërkohë në një deklaratë për mediat mjeku Gent Stroni u shpreh se një mjek mund të shkarkohet nga detyra apo dënohet, vetëm në momentet kur i shkakton një dëm pacientit, dhe në asnjë rrethanë tjetër.
“Shumë prej mjekëve janë duke u përballur me Covid, një pjesë janë ndarë nga jeta, dhe shohim se kemi luksin që të nxjerrim nga kjo luftë mjekë të vijës së parë. Para 35 vitesh thuhej se ishte armik i klasës dhe duhet të shkojë të reabilitohet një mjek nuk mund të dënohet sepse janë asete të çmuara veçanërisht në situatën që po kalojmë.
Mjeku dënohet kur me veprimin dhe mos veprimin e tij çon në vdekjen e një personi, kjo që po ndodh është e papranueshme, jemi në përkrahje të këtij kolegu dhe jo vetëm, nesër mund ta kemi ne këtë hise. Nesër pasnesër mund t’i ndodhë çdokujt por nuk është rruga e drejtë për të zgjidhur problemet. Është e sigurt që ky mjek do të fitojë në gjykatë. Sindikata do të dalë në një vendim tjetër për të vazhduar protestën” tha Stroni.
Kujtojmë se QSUT ndërpreu ditën e djeshme marrëdhënien e punës me mjekun Ilir Allkja, pasi sipas këtij institucioni mjeku ka shkelur kodin etik të punonjësit./ Opinion.al
