Një 36-vjeçar është vënë në pranga nga policia e Korçës, pasi u konstatua se ai shiste kokainë nëpër qytet.
Uniformat blu bëjnë me dije se kanë arrestuar në flagrancë shtetasin A.S. 36 vjeç, pasi shpërndante lëndë narkotike kanabis dhe kokainë në qytet, si dhe kultivonte fidanë narkotikë, në banesë.
Gjatë kontrollit policia ka sekuestruar dhjetëra doza të lëndës narkotike kokainë dhe një shumë parash e përfituar nga veprimtaria kriminale.
“Në vijim të veprimeve hetimore të kryera në kuadër të operacionit policor të koduar “Night sales”, i finalizuar 3 ditë më parë, specialistët e Seksionit për Hetimin e Trafiqeve të Paligjshme dhe Narkotikëve të DVP Korçë kanë goditur një tjetër rast të veprimtarisë kriminale të shitjes së lëndëve narkotike.
Si rezultat i operacionit policor të koduar “Night sales 2” u arrestua në flagrancë shtetasi A. S., 36 vjeç, banues në Korçë.
Shërbimet e Policisë, në bazë të informacioneve të siguruara nga inteligjenca informative se ky shtetas shpërndante doza të lëndëve narkotike, në qytetin e Korçës, kanë organizuar menjëherë punën dhe kanë lokalizuar në lagjen nr. 17, automjetin tip “BMW”, me të cilin po qarkullonte shtetasi A. S.
Gjatë kontrollit të ushtruar në automjetin dhe më pas në banesën e 36-vjeçarit, u gjetën dhjetëra doza me lëndë të dyshuar narkotike kokainë, të cilat u sekuestruan në cilësinë e provës materiale, së bashku me një shumë parash që dyshohet se ishte përfituar nga veprimtaria kriminale”, tha policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme./Opinion.al
