Policia e Tiranës ka vënë në pranga një 27-vjeçar që posedonte dhe tregtonte lëndë narkotike dhe municion luftarak.
Në bazë të informacioneve të siguruara në rrugë operative nga burime të ndryshme, shërbimet e Komisariatit të Policisë Nr. 4 në Tiranë, finalizuan operacionin e koduar “FRESKU”, në kuadër të të cilit u bë kapja dhe arrestimi në flagrancë i shtetasit S. S., 27 vjeç, banues në Zall Bastar të Tiranës.
Sipas njoftimit zyrtar të policisë ky shtetas tregtonte lëndë narkotike cannabis sattiva për shtetas të ndryshëm, përdorues të saj, në zonën e Freskut, Tiranë, si dhe tregtonte municion luftarak.
Nga kontrolli i ushtruar ndaj tij, në rrugën “Qemal Deliu”, është gjetur një sasi cannabis sattiva, ndërsa në banesën e tij, është gjetur dhe një qese e mbushur cannabis, gjithsej 836.6 gramë.
Nga veprimet e para hetimore rezultoi se ky shtetas kishte dhe një banesë në fshatin Selitë, Tiranë dhe nga kontrolli në këtë banesë janë gjetur dhe sekuestruar 40 kuti kartoni të mbushura me fishekë luftarak, 8 karikatorë ( gjithsej 1 318 fishekë) dhe fitil zjarrpërcjellës.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore, për veprat penale “Mbajtja pa leje armëve shpërthyese dhe e municionit” dhe ”Prodhimi dhe shitja e narkotikëve”. /Opinion.al
