Lulzim Basha ka ka zbuluar se çfarë pret nga protesta e së shtunës. Në një takim me të rinjtë në kryeqytet, kryedemokrati tha se shqiptarët e bashkuar do ta vendosin Edi Ramën përpara dy alternativave, përpara drejtësisë ose në azil politik t’i bashkohet Gruevskit.
“Para një viti nisi një rezistencë kundër prishjes së Teatrit, një afere prej 200 milionë eurosh, para 3 muaj e gjysëm, nisi qëndresa e banorëve të Unazës së Re, kundër prishjes së shtëpive të tyre, ku Edi Rama do i jepte një kompanie fantazëm 18 milionë euro. Të gjitha këto nisën si kauza të njerëzve të dëshpëruar. Kështu nis edhe përpjekja studentore. Falë qëndresës së intelektualëve dhe qytetarëve tek Teatri, falë qëndresës dhe bashkimit tek Unaza dhe falë lëvizjes studentore, gjerat kanë ndryshuar. Qytetarët nuk duhet të fshihen, Edi Rama duhet të fshihet. Ia ka mbathur për në Vlorë por edhe Vlora do ta përzë. Nesër shqiptarët do ta vendosin përpara dy alternativave, përpara drejtësisë ose në azil politik t’i bashkohet Gruevskit”, tha Basha. Kryedemokrati gjatë muajit shkurt ka bërë disa takime me qytetarët në rrethe.
Për protestën e së shtunës policia ka frikë për një skenar dhune. Hyrja kryesore e Kryeministrisë u mbulua me rrjeten mbrojtëse. Sipas deklaratës zyrtare të Policisë, theksohet se janë administruar informacione se persona të caktuar, me rekorde kriminale apo të dënuar më parë për vepra të rënda penale, janë përgatitur për të ushtruar dhunë.
Për këtë arsye policia e Tiranës por edhe repartet speciale, përfshirë forcat e ndërhyrjes së shpejtë dhe RENEA-n prej mëngjesit të së premtes kaluan në gadishmëri të përforcuar.
Uniformat blu ende nuk kanë rënë dakort me organizatorët e protestës së Partisë Demoktarike mbi akset ku do të zhvillohet tubimi përveç Bulevardit “Dëshmorët e Kombit”. Policia i “druhet” rrethimit të Kryeministrisë nga turma, ndaj nuk ka vendosur bllokimin e rrugëve në krah të godinës së qeverisë dhe hapsirës përpara Piramidës.
Rreth 1500 efektivë pritet të jenë të shtunën në detyrë për të garantuar rendin e sigurinë publike ndërsa për qytetarët që nuk janë pjesë e protestës policia riperseriti thirrjen që të shmangin mjediset, ku ajo do të zhvillohet. Agjentë të antiterrorit dhe shërbimeve inteligjente po ashtu do jenë në terren.
