Prefekti i qarkut të Lezhës, Gjokë Jaku ka raportuar se si paraqitet situata në qarkun e Lezhës si pasojë e motit të keq.
Prefekti Jaku thotë se më të prekurat në qark janë Kurbini dhe Lezha. Sipas tij janë përmbytur dhe vijojnë të jenë nën ujë rreth 2 mijë hektarë tokë bujqësore por deri më tani asnjë banesë.
”Në 24 orët e fundit në qarkun e Lezhës kanë rënë 120 mm shi. 2 njësitë Kurbin dhe Lezha janë më të prekurat Kryesisht kjo e fundit, në gjithë territorin. Ka dëme kryesisht në Zadrinë, që ka prekur 3-4 njësi. Për rrjedhojë një pjesë e tokës bujqësore është nën ujë. Janë rreth 2 mijë hektarë tokë që ka prezencë ujë. S’ka deri më tani përmbytje të banesave.
E rëndësishme është që gjithë hidrovorët janë, dhe nëse janë të furnizuar pa ndërprerë me energji elektrike, masa e ujit do tërhiqet brenda 24 orëve.
Jemi njoftuar që mbrëmë në 22:00, për shkarkimet në Ulëz dhe Shkopet. Mbrëmë e kanë nisur me 500 m3, kurse tani janë 600. Pashë vetë nga Skurraj në grykëdedhjen e lumit Mat. Nuk ka probleme në argjinatura. Por Drini është në kuota maksimale, çka mund të na hapë probleme.
S’kemi asnjë problem për fat të mirë, as në banesa as në njerëz, as në kultura bujqësore, as në blegtori. Shpresojmë që dhe moti të jetë në anën tonë, të jetë shkarkuar pjesa dërrmuese e rreshjeve.”-shprehet Prefekti.
Gjokë Jaku shprehet se territori i lagjes së Spitalit në Lezhë, është mjaft i rrezikshëm dhe banorët janë evakuar nga banesat e tyre, e shkak është bërë rrëshqitja e dherave.
“Kam parë vetë sot në orët e para të mëngjesit situatën, është e rrezikshme për shkak të prezencës së disa banesave, ka një rrëshkitje, në një tokë që as duhet të ishte ndërtuar, as duhet ishte lejuar. Nga pikëpamja gjeologjike është terren rrëshkitës. Territori aty është mjaft i rrezikshëm. Banorët janë evakuar.”– tha Jaku./Opinion.al
