Katër persona në Kanada, përfshirë dy fëmijë, janë raportuar të zhdukur në përmbytjet e shkaktuara nga shirat e rrëmbyeshëm në Nova Scotia, ka thënë policia.
Zyrtarët thonë se shirat më të dendur që kanë goditur rajonin e Atlantikut në 50 vjet kanë shkaktuar përmbytje duke lënë mijëra shtëpi pa energji elektrike.
Banorëve u është bërë thirrje që të mos bashkohen në kërkimet për të zhdukurit për shkak të kushteve të rrezikshme.
Dy fëmijët e zhdukur ndodheshin në një makinë që u zhyt nga ujërat e përmbytura, njoftoi policia. Gjithashtu një burrë dhe një i ri rezultojnë gjithashtu të zhdukur pasi mjeti në të cilin ndodheshin është zhytur në ujë.
Rrugët janë përmbytur dhe urat janë dobësuar në Nova Scotia, ku në disa zona është shpallur gjendje e jashtëzakonshme.
“Ne kemi një situatë të frikshme, domethënëse,” tha Kryeministri i Nova Scotia, Tim Houston, duke shtuar se të paktën shtatë ura do të duhet të zëvendësohen ose rindërtohen.
Ai vlerësoi se mund të duhen disa ditë që ujërat të tërhiqen. Më shumë se 80,000 njerëz mbetën pa energji në një moment.
Meterologët në Kanada thonë se shiu i rrëmbyeshëm në zonën lindore të provincës mund të vazhdojë edhe të dielën.
Përmbytja është ngjarja më e fundit ekstreme e motit që ka goditur verilindjen e Kanadasë – zjarret e fundit kanë djegur një zonë rekord, duke dërguar retë tymi në jug të SHBA.
Këtë muaj ka pasur edhe përmbytje ekstreme në SHBA. Trupi i një vajze dy vjeçare të gjetur përgjatë një lumi në Pensilvani besohet të jetë një nga dy fëmijët e zhdukur që u përfshinë nga përmbytjet fundjavën e kaluar.
