Numri i personave që kanë humbur jetën për shkak të koronavirusit në Mbretërinë e Bashkuar është rreth dyfishi i shifrave zyrtare që njoftohen çdo ditë.
Kështu paralajmëron rrjeti prestigjoz BBC, i cili shkruan se mënyra e llogaritjes që bëhet nga ekspertët e statistikës, duke numëruar të gjitha vdekjet, e bën bilancin me më shumë se 50 mijë jetë të humbura që prej shpërthimit të pandemisë.
Numri i vdekjeve nga Covid-19 sipas shifrave zyrtare, ishte mbi 28 mijë deri më 1 maj, por rishikimi i regjistrit të gjendjes civile deri në atë kohë, tregon se në rreth 36 mijë certifikata vdekjeje të lëshuara përmendej Covid-19 si shkak dytësor.
Po ashtu, në artikull, shpjegohet pse nuk duhet të merren për bazë shifrat e përditshme të qeverisë. Sipas medias britanike, në raportimin e Departamentit të Shëndetësisë përfshihen vetëm ata persona që humbasin jetën dhe që janë të konfirmuar me koronavirus.
Kjo është një metodë me mjaft mungesa pasi në të nuk përfshihen viktimat e pa testuara për Covid-19 dhe para disa javëve, Anglia nuk përfshinte në shifrat zyrtare personat që vdisnin nga virusi jashtë spitaleve./Opinion.al
