Policia ka arrestuar një 28-vjeçar grek sot në pikën kufitare të Kapshticë, pasi akuzohet për ushtrim prostitucioni.
Uniformat blu bëjnë me dije se shtetasi F.P. kishte shfrytëzuar prej një muaji për prostitucion një 30-vjeçare nga Greqia.
Nga informacionet zyrtare mësohet se u kap në tentativë për t’u larguar në shtetin fqinj.
Ndërkohë policia ka shpallur në kërkim dhe një person tjetër, i dyshuar se i ka vjedhur të resë shuma parash.
“Finalizohet operacioni policor i koduar “Indicia”, si rezultat i një hetimi disajavor, me metoda proaktive. Shfrytëzoi për prostitucion, një 30-vjeçare nga Greqia, kapet gjatë tentativës për t’u larguar përmes PKK Kapshticës, dhe vihet në pranga 28-vjeçari nga Greqia.
Procedohet penalisht 30-vjeçarja, për ushtrim të prostitucionit. Specialistët e Seksionit për Hetimin e Narkotikëve dhe Trafiqeve të Paligjshme të DVP Durrës, pas një hetimi proaktiv, disajavor, të ndjekur në bashkëpunim me Prokurorinë e Durrësit, finalizuan operacionin policor të koduar “Indicia”.
Në kuadër të këtij operacioni, në bashkëpunim me Policinë Kufitare të Kapshticës, u kap gjatë tentativës për t’u larguar nga vendi ynë, shtetasi F. P., 28 vjeç, banues në Greqi. Nga hetimet ka rezultuar se 28-vjeçari, gjatë këtij muaji, ka shfrytëzuar për prostitucion një 30-vjeçare nga Greqia, ndaj së cilës filloi procedimi në gjendje të lirë për veprën penale “Prostitucioni”.
Gjithashtu, nga veprimet hetimore dyshohet se një shtetas ende i paidentifikuar, i ka vjedhur 30-vjeçares, një shumë parash. Vijon puna për identifikimin, kapjen dhe arrestimin e tij”, tha policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme./Opinion.al
