Një 26-vjeçar është vënë në pranga pasi dyshohet se krijonte llogari të rreme në rrjete të ndryshme sociale. Një tjetër, një vajzë 28 vjeçe, është proceduar penalisht.
Këta dy persona dyshohet se janë të implikuar dhe në veprimtarinë kriminale në fushën e ushtrimit dhe shfrytëzimit të prostitucionit.
Arrestimi i të riut erdhi pas një hetimi intensiv tremujor të policisë. Si rezultat i operacionit policor të koduar “The puzzle”, “u bë ndalimi i shtetasit K. A., 26 vjeç, banues në Tiranë. Gjithashtu u procedua penalisht shtetasja K. H., 28 vjeçe, banuese në Tiranë”, njofton Policia.
Nga veprimet hetimore të kryera ka rezultuar se këta dy shtetas, në bashkëpunim me njëri-tjetrin, vidhnin gjeneralitetet të shtetasve të ndryshëm, dhe krijonin llogari të rreme në rrjete të ndryshme sociale. Po ashtu, gjatë hetimeve ka rezultuar se këta dy shtetas, në bashkëpunim me njëri-tjetrin, kryenin veprimtari kriminale në fushën e ushtrimit dhe shfrytëzimit të prostitucionit.
Po punohet për identifikimin dhe kapjen e personave të tjerë, të implikuar në këtë veprimtari kriminale.
