Policia ka arrestuar në Tiranë një grup hajdutësh të cilët për rreth një muaj ishin kthyer në problem për bizneset pasi ishin përfshirë në 12 grabitje.
Nga fundi i korrikut e deri në ditët e fundit të gushtit, 4 personat kanë shënjestruar lokale, dyqane, piceri si dhe një pikë këmbimi parashë.
Ajo që është më shqetësuese është se grupi përbëhet nga një 23-vjeçar dhe tre minorenë të moshave 17 dhe 15 vjeç.
Policia njofton se gjatë operacionit policor të koduar “Shëtitësit e mesnatës”, janë arrestuar shtetasit A. M., 23 vjeç, K. S., 17 vjeç (të dy të dënuar më parë për veprën penale “Vjedhja”), A. C, 17 vjeç dhe O. I., 15 vjeç.
Nga hetimet dhe provat e siguruara rezulton se këta shtetas janë autorët kryesorë të dyshuar për 6 grabitje dhe 6 të tjera të mbetura në tentativë.
Gjithashtu, nga verifikimet ka rezultuar se shtetasi K. S., ka thyer vendimin e Gjykatës, pasi ajo i kishte vendosur masën e sigurisë “Arrest në shtëpi”.
Vijon puna për dokumentimin e vjedhjeve të tjera të ndodhura në qarkun e Tiranës, në të cilat mund të jenë të implikuar këta shtetas.
Materialet i kaluan Prokurorisë së Rrethit Gjyqësor Tiranë, për veprime të mëtejshme./ Opinion.al
