Vritet administratori i njësisë Kote në Vlorë, ndërsa një person tjetër ka mbetur i plagosur. Sipas policisë lokale mësohet se një person ende i paidentifikuar ka qëlluar me armë zjarri ditën e sotme administratorin Argjil Gjoka. Nga të dhënat e para, mësohet se ngjarja ka ndodhur në fshatin Pet.
Gjoka mësohet se ndërhyri në sherrin mes dy vëllezërve, që po konfliktoheshin për çështje pronësie, por në tentativë për t’i ndarë ata, mori një plumb në gjoks.
Argjil Gjoka u dërgua me urgjencë në spital, por nuk mundi të mbijetojë. Ndërkohë personi tjetër, i cili ka mbetur i plagosur, është Arif Bejtaj 19 vjeç. Ai ka marrë një plagë në krah dhe ndodhet jashtë rrezikut për jetën. Policia po punon për arrestimin e autorit të kësaj ngjarje.
Në nëntor të 2018-ës, është vrarë me armë ish-kreu i njësisë Administrative Kotë, Fatmir Hodo. Për ngjarjen në atë kohë u arrestua 44-vjeçari Admir Delaj nga fshati Gumenicë
Delaj qëlloi Hodon me armë gjahu pas një bisede të tensionuar për çështje pronësie, në hyrje të një lokali ndërsa të dy kishin konsumuar pije alkoolike bashkë disa minuta para se të ndodhte ngjarja.
Pas vrasjes së Fatmir Hodos, vendin e tij e zuri Argjil Gjoka, i cili po ashtu u vra për një konflikt me në qendër çështjes e pronësisë, edhe pse vetë ai nuk ishte objektivi./ Opinion.al
